Flateyjarkirkjugarður á Skjálfanda

Staðsetning: Flateyjarhr., S-Þingeyjarsýslu.
Fjöldi einstaklinga: 
3

Fjöldi legsteinamynda: 
5

Ljósmyndari: Eiríkur Þ. Einarsson (2022).
Fjöldi kvenna: 
1

Fjöldi karla: 
2

Meðalaldur: 
53
ár
Vökumaður: Guðmundur Jónas Árnason
Skoða garðinn í gagnagrunninum

Hér er um að ræða nýrri kirkjugarðinn í Flatey á Skjálfanda. Sá eldri var á bæjarhlaði Útibæjar fram til 1897 þegar Brettingsstaðakirkja var byggð. Garðurinn var hringlaga og í honum miðjum var timburkirkjan sem var reist 1851. Um það leyti var Útibær með tveimur burstum sem snéru til suðurs. Um aldamótin 1900 var byggt framhús við bæinn, sem snéri göflum til austurs og vesturs, en langhlið fram á hlaðið í átt kirkjunnar. Um 1940 var nýtt íbúðarhús úr steinsteypu byggt í Útibæ og náði suðvesturhorn þess inn í kirkjugarðinn gamla, sem þa hafði löngu verið aflagður. Smám saman máðust burt öll ummerki gamla kirkjugarðsins. Leiðin voru sléttuð og kirkjugarðsveggurinn fjarlægður. Ekkert sér lengur móta fyrir garðinum, en heimamenn þekkja þó legu hans vel. Ef einhver sem þetta les, á leið þarna um, væri gaman að fá mynd af staðsetningunni á gamla kirkjugarðinum 🙂

Nýi garðurinn er ferhyndur og umhverfis hann er girðing úr tréstaurum með reipi á milli. Sáluhlið er á vesturhlið hans, gert úr járni með burst yfir og krossi ofan á.

Í garðinum eru einungis 3 leiði, fyrsta greftrunin átti sér stað 27. september 1955, þegar Guðmundur Jónas Árnason var jarðaður (er hann því vökumaður garðsins) og sú síðasta átti sér stað 25. nóvember 1957 en þá var Jóhannes Kristinsson jarðaður. Inn á milli þessa tveggja greftrana var Nanna Jónsdóttir jörðuð 25. júlí 1956. Mér hefur ekki tekist að finna neitt að ráði um þetta fólk, ef þið vitið eitthvað meira um þau sem bæta má á síðuna, megið þið endilega láta mig vita.

Myndirnar í Flateyjarkirkjugarði á Skjálfanda tók Eiríkur Þ. Einarsson og fær hann kærar þakkir fyrir!

Heimild:
Kirkjur Íslands 21. bindi, s. 73-74