| Athugasemdir |
- Faðir Halldóru var Marteinn Erlendsson bóndi í Haga, Grænhól og Siglunesi á Barðaströnd. Móðir hennar var Ólafía Ástríður Þórðardóttir. Halldóra og systkini hennar voru oft kölluð Siglunessystkinin. Halldóra tók sér klausturheitið systir María Jóhanne, en var oftast kölluð systir Jóhanna.
Halldóra gekk ung í reglu St. Jósefssystra og lauk hjúkrunarnámi frá systrunum í Kaupmannahöfn og starfaði síðan við Landakotsspítalann og St. Jósefsspítala í Hafnarfirði til dauðadags. Oft er sagt að áföll verði til þess að konur gangi í klaustur og svo mun hafa verið með Halldóru. Hún var aðeins tíu ára þegar móðir hennar dó af barnsförum, frá stórum barnahópi, fjórum börnum yngri en Halldóra. Ári síðar var faðir hennar allur, féll af hestbaki á Kleifaheiði og beið bana.
Bróðir Halldóru var Ólafur Ástráður Marteinsson meistari í íslensku. Hann veiktist af lömun á unga aldri og lést langt um aldur fram.
Systir María Jóhanna var að sögn hæglát og virðuleg kona og hvers manns hugljúfi. Hún var vel verki farin, vinnusöm og trygglynd. Það fer fáum sögum af starfi Halldóru. Sigurveig Guðmundsdóttir, sem kynntist henni lítillega, segir hana hafa verið með afbrigðum vinsæla hjúkrunarkonu, glaðlega og elskulega. Halldóra andaðist árið 1944. Rúmum sextíu árum eftir dauða hennar, árið 2006, hittu tvær frænkur hennar, mæðgurnar Jónína Hafsteinsdóttir og Særún Árnadóttir, í Kaupmannahöfn, háaldraða nunnu með klausturheitin Anna Pauline. Hún mundi eftir Halldóru og sagði að hún hefði verið ,,en dygtig og glad søster". Systir Anna Pauline hét Magdalena Schnase og var fædd 1911. Hún var ættuð frá Austur-Þýskalandi. Hún hafði starfað á Íslandi áratugum saman ásamt systur sinni, systur Lioubu, sem verið hafði skólastjóri barnaskóla systranna í Hafnarfirði. Báðar áttu þær systurnar sitt ævistarf á Íslandi og þökk sé systur Pauline varðveittist þessi fallega, litla setning til minningar um ævistarf Halldóru Marteinsdóttur. [3]
|
1889 - 1944 (54 ára)
[2] 
