Viðeyjarkirkjugarður

Staðsetning: Reykjavík.
Fjöldi einstaklinga: 
32

Fjöldi legsteinamynda: 
25

Ljósmyndari: Hörður Gabríel (2021).
Fjöldi kvenna: 
16

Fjöldi karla: 
16

Meðalaldur:
 
59
ár
Skoða garðinn í gagnagrunninum

Kirkjugarðurinn í Viðey er ferhyrndur, 26,85 metrar að lengd og 18,65 metrar á breidd, og stendur kirkjan í austurenda hans. Kirkjugarðurinn er að stærstum hluta rennislétt grasflöt. Utan með honum er hlaðinn hálfs metra hár steingrður á þrjá vegu, gerður úr tilhöggnu grágrýti og steinlímdur. Garðurinn nær einn meter austur fyrir kirkjuna en austan undir henni er hleðslusteinn sléttfelldur í steinleggingu milli húsa í veggjar stað. Þeim megin er garðurinn opinn milli stofu og kirkju. Stærstur hluti kirkjugarðsins er rennislétt grasflöt en sunnan undir framstafni er steinlagt hlað og í norðausturhorni garðsins steinlögð skák. Þar sem gengið er af hlaðinu inn í garðinn er lágur ferstrendur steinn, skásniðinn að ofan og með svofelldri áletrun: HELGUR REITUR – HELLIG GRUND – SACRED GROUND.

Í garðinum er að finna nokkuð fjölbreyttar gerðir minningarmarka og hvíla þar þjóþekktir menn.

Meðal þeirra má nefna Ólaf Stefánsson Stephensen stiftamtmann og son hans Magnús Ólafsson Stephensen dómstjóra. Við gafl kirkjunnar hefur reitur verið helgaður þeirri ætt og nefndur Stefánungareitur.

Nýlegir steinar eru bæði á leiði Ólafs S. Stephensens og konu hans annarsvegar, og Magnúsar Ó. Stephensens og fjölskyldu hans hinsvegar, en sá steinn var reistur 1933.

Kona Magnúsar var Guðrún Vigfúsdóttir Scheving. – Tengdadæturnar gætu verið systurnar Sigríður Stefánsdóttir og Marta Stefánsdóttir. – Báðar voru um tíma giftar syni þeirra Ólafi Magnússyni Stephensen (1791-1872).

Barnabörnin gætu verið Sigríður Stephensen f. sk. 22. ágúst 1830, d. 31. des. 1830. og Friðrik Theodór Stephensen f. sk. 7. nóv. 1833. Marta var móðir Sigríðar og Friðriks Theodórs og dó hún af barnsförum.- (allur fyrirvari áskilinn á getgátum).

Í Viðeyjarkirkjugarði hvíla einnig Vigfús Scheving Hansson og kona hans Anna Stefánsdóttir, en á leiði þeirra hafa verið a.m.k. tveir mismunandi legsteinar. Um þann eldri, sem er orðinn illa farinn, má lesa nánar hér. Sá nýrri er mjög einfaldur og látlaus en sá eldri var mun veglegri mætti kannski segja.

Gunnar Gunnarsson og kona hans Franzisca kusu sér leg í Viðeyjarkirkjugarði og hvíla þar ásamt nokkrum afkomendum sínum. Er Gunnar var að skrifa bók sína um Jón biskup Arason hreyfst hann mjög af persónu hans og sögu allri. Við heimildaleit taldi hann sig finna það út, að kirkjugarðurinn í Viðey hefði aldrei verið vígður frá því Jón biskup endurvígði staðinn, enda hefur kirkjugarðurinn minnkað mikið síðan og því hefur ekki þurft að vígja endurbætur við hann. Þessi uppgötvun leiddi til þess, að þeim hjónum fannst Viðey eftirsóknarverður legstaður fyrir þau, hana sem góðan kaþólikka og hann sem aðdáanda herra Jóns.

Myndirnar í Viðeyjarkirkjugarði tók Hörður Gabríel og fær hann kærar þakkir fyrir!
Soffía Guðrún Gunnarsdóttir hjálpaði mér með ýmsa gagnaöflun varðandi þennan kirkjugarð og fær hún kærar þakkir fyrir!

Heimild:
Kirkjur Íslands 19.bindi, s. 177-179.
Þorsteinn Veturliðason (FB. hópurinn Legstaðaleit í október 2021).

Leave a Comment

Your email address will not be published.